!!حسّوا باهاِ
الدنيا تدور
و كل حد عندو ما يقول
في هذا شرفو مستور
و هذاك للريح يدور
إي علا خاطر أمّو ما ربت
و جدّاه ما ضربت
و عمتو ما كبرت
و بوه وينو؟
بوه للدنيا بايع
في طريقها ضايع
شخلاّه في الحبس لعامو الرابع
و مرتو لا حدّ سإل علاها
مهدودة و شاقية و بعرق جبينها عايشة
لا لقمة حرام في دارها بايتة
و حقّ صغارها مش ناسية
تتكلّم و كلامات النّاس مش شايفة
ولا لوجيعتها شايفة
أما تقعد مش باش تسلّم
للدّنيا ديما تتبسّم
لحقّها ديما تتكلّم
هاذيكا هي المرا المناضلة
أما فمّا شكون يقلّك
"مسكينة هي باهية أما ولدها العايق"
هو يشوف بوه يضرب يسرق يغتصب يزطّل
و يسكت؟؟؟
صحيح خاطيه
كيما يقولوا"ذاك الشبل من ذاك الأسد
و يفزلّك البو يقلك "أعمل و راسي يسدّ
لا حدّ ينجّم يديه عليك يمدّ
و كي يجدّ الجدّ
" ناديلي أتو نجي نهدّ
!!أي مسكينة
ملّي كانت تعاني في واحد ولّو زوز
للطريق الغالط هزّوه
و بالعمايل فزّدوه
و مالمدرسة طرّدوه
و مالصّنعة بطّلوه
و في القهوة عذّبوه
يالّلي بيك يالّلي عليك
و عينيه حلّوها
للحرقة رسموها
و العيشة غادي جمّلوها
"و للمشية سهّلوها"مليون و شقف
و لأمّو لوّحوها
ضربوها عذّبوها و كلوها
!!!!أي مسكينة
في ليلة هي راقدة
تحسّ في الدنيا باردة
رعد و مطر و البرّا هايجة
!!!!أما ولدها
ههههه, ساكو و الشّطّ
و لا عاد يتلفّت لحدّ
ركب و هوّ ما كيفو حدّ " يالبابور يالمونامور
!!!ههههه
أما هاو هزّو لللّاميزير
مع آلاف العباد فرد بازار
و عينيه ماعادش تشوف الدّار
للموت مشى
و مبعد ما جى
!!!!أي مسكينة
أمّوا صادها العمى
خاطر عيناها ما وقّفت البكى
و قلبها إلّي عامل العزى
!!!!أي مسكينة
ما كانتش تعرف النّهاية
و كلّ مرّة كانت تسخايلها البداية
M.H.A
